Танцовото и фитнес студио Dancers United од Скопје со еден куп медали се врати од Европското првенство во танц што на 29 и 30 април се одржа во Варшава. Во повеќе категории, ова студио за закити со повеќе медали. Со инклузивната танцова точка на лица со типичен и со атипичен развој, успеaја да ја одбранат титулата светски прваци и да се закитат со уште еден златен медал од Светскиот куп.
Танчерите на Dancers united со типичен развој, покрај со оваа одбранета титула и освоен златен медал од Светскиот куп, од Европското првенство во Варшава си заминаа со уште неколку шампионски титули на европско ниво и тоа: златен медал во категорија младинци група латино поу, сребрени медали во категории деца и јуниори мала група латино шоу, шампионска титула за најмладиот танчер на студиото Емили Нера Кочан во категорија мини кидс латино шоу, сребрени и бронзени медали во категорија латино танци соло девојки и парови младинци.
Воедно на Европското првенство во Варшава 2022 како официјални судии на натпреварот нашата држава ја претставуваа Сара Кочан и Нермин Кочан, основач на „Денсерс јунајтед“.
Скопското танцово и фитнес студио Dancers United, е клуб кој повеќе години наназад продуцира врвни танчери и танчерки, кои освојуваат медали на домашни и меѓународни натпревари, во разни категории на танци на европско и на светско ниво. Но, уште позначајно за ова студио, со кое тоа се одвојува од останатите, е тоа што во својата програма, од далечната 2013 година опфаќа и лица со Даун синдром и други попречености.
– Во Варшава повторно се вееја македонските знамиња и се пееше македонската химна. И овој пат овие наши културни амбасадори заблескаа во сиот свој сјај. На радоста и на емоциите им немаше крај. На ваков начин студиото на овие лица им овозможува да изградат успешни приказни во светот на танцот и со сопствен настап или инклузивно со останатите танчери со типичен развој, да освојуваат медали на домашните, европските и светски шампионати – вели Сара Кочан.
Студиото ова патување го изреализира со помош на Министерството за култура и бројните пријатели и поддржувачи, вклучувајќи ги Халк Банк, Ултра ДОО, Општина Карпош, Милк Кидс, Адора Инженеринг, Дадекс Дејан, Јелисавета Трајковска.
